HATAW! D'yaryo ng Bayan hatawtabloid.com
TIYAK na napakamot sa ulo at napapailing pa ang mga damuhong nasa likod ng inilargang ‘demolition job’ sa media matapos muling maitalaga sa kanyang dating puwesto si Atty. Ma. Lourdes Mangaoang bilang hepe ng Bureau of Customs X-ray Inspection Project (BoC-XIP).
Kaya’t wala na si Mangaoang sa passenger services ng Ninoy Aquino International Airport (NAIA) na pinagtapunan sa kanya ni ngayo’y TESDA Sec. Isidro Lapeña, dating hepe ng Customs na sinibak ni Pangulong Rodrigo “Digong” Duterte kaugnay ng mahigit sa P11-B shabu shipment na pinalusot ng/sa Customs.
Malaki pa naman ang pinakawalang budget sa media para siraan at pasamain ang imahen ni Mangaoang sa publiko bunsod ng kanyang walang-takot na pagtestigo sa magnetic lifters na pinaniniwalaang kargado nang mahigit sa P11-B halaga ng shabu na natagpuan ng Philippine Drug Enforcement Agency (PDEA) sa GMA, Cavite at inimbestigahan ng Kamara at Senado nitong nakaraang taon.
Ang hindi lang natin alam ay kung may balak si Mangaoang na buweltahan ang masisiba sa pera na nagpagamit sa pagpapakalat ng mga malisyosong paninira laban sa kanya at nasa payola ng malalaking sindikato sa Customs.
Nabasa natin ang mga paninirang isinulat laban kay Mangaoang sa ilang tabloid na talaga namang sagad sa butong pamemersonal at pagmamalabis ng mga nagpapanggap na journalist.
Aywan lang natin kung maatim ni Mangaoang na palagpasin ang ginawang pagyurak sa kanyang matinong pangalan at pagkatao.
Akalain n’yo, ginamit pa ng mga walanghiyang timawa na basehan ang paghahain ng inimbentong kaso ng isang nagpapanggap na ‘crusader’ daw laban kay Mangaoang upang mapalitaw na lehitimo at kapani-paniwala sa publiko ang mga paninira sa media.
Una nang nabiktima si Mangaoang ng katulad na demolition job sa media matapos niyang masabat ang malaking shipment ng mga kemikal na sangkap sa paggawa ng shabu noong siya ang distict collector ng Customs sa Zamboanga Port, maraming taon na ang nakalilipas.
Kinasuhan ni Mangaoang ang isang nagngangalang Li Peng Wee, ang may-ari ng nasabat na kontrabando na napag-alamang malapit na crony at adviser pala ni ousted president at convicted plunderer Joseph “Erap” Estrada na noo’y nakaupo sa Malacañang.
Sa pagkakatanda pa natin, ang pagkakahain ni Mangaoang ng kaso ang naging sanhi ng paninira sa kanya ng isang nasa media na nagtangka pero nabigong arborin at areglohin ang suspected drug lord na Tsekwa.
Ang pagkakatalaga kay Mangaoang bilang hepe ng BoC-XIP ay kapwa pirmado nina Deparment of Finance (DoF) Sec. Carlos Dominguez at Commissioner Rey Leonardo Guerrero sa bisa ng customs personnel order (CPO) na may petsang Jan. 4.
Kung hindi tayo nagkakamali, si Mangaoang ang kauna-unahang umupo bilang hepe ng XIP mula nang maitatag ito sa panahon ng administrasyon ni GMA.
Sa mga gagong nasa likod ng paninira sa kanya, subukan n’yo na lang kaya na hamunin si Mangaoang ng draw, na sa pagkakaalam natin ay sharp shooter, para magkaalaman, hehehe!
Pero isa lang ang natitiyak natin, sina Domniguez at Gurerrero ay hindi nagkamali na ibalik si Mangaoang.
(Para sa anumang sumbong at reaksiyon, mag-text o tumawag sa 09166240313. Maaring ipadala ang inyong liham sa e-mail address: [email protected])
KALAMPAG
ni Percy Lapid
