NAKALULUNGKOT ang nangyayari ngayon sa Philippine Health Insurance Corporation (PhilHealth) lalo sa mga empleyadong ilang taon nang naglilingkuran sa nasabing ahensiya ng pamahalaan.
Sila rin ‘yung mga empleyadong sinanay ng ahensiya para maging mabilis at epektibo ang serbisyo ng ahensiya sa publiko.
Pero ngayon, sila ang mga empleyadong biktima ng mga power tripper sa PhilHealth.
Bago natin isalaysay ang kanilang grabeng stressed sa panggigipit ng mga power tripper, binabati muna natin ang mga napaboran ng
temporary restraining order (TRO) na inilabas ng Regional Trial Court (RTC) ng Pasig City laban sa pagsibak ni Interim/OIC President Dr. Celestina Ma. Jude P. De la Serna sa casual employees ng PhilHealth.
Ipinalabas ni Pasig RTC Executive Judge Danilo Cruz ang TRO laban sa pagsibak sa anim casual employees na 19 taon na sa serbisyo sa PhilHealth.
Nauna rito, ang anim mula sa 17 casual employees ng PhilHealth na inisyuhan ng notice of termination noong 18 Enero 2018, ay dumulog sa Pasig RTC laban sa pending termination sa kanilang casual employment mula sa PhilHealth sa 31 Enero 2018.
Kabilang sa kanila sina Rosario Rhea N. San Miguel, single mother na may anak na may sakit at empleyado ng Philhealth sa nakaraang 19 taon; Norman Capagngan at Ivy Mendiola, common-law partners na may tatlong anak, kapwa registered nurses at pitong taon empleyado ng Philhealth; Maricel Laforteza, family bread winner; Mary Joy Fernandez, single parent na may dalawang anak na babae at Blessie An de Guzman, may asawa at dalawang anak, na empleyado ng Philhealth sa nakaraang siyam, anim at 13 taon.
Isinagawa ng mga empleyado ang hakbang makaraan ang kanilang apela sa PhilHealth Board para sa intercession and intervention, gayondin, nang ang kanilang dalawang beses na pakikipag-usap kay Secretary Francisco T. Duque, ay walang naging positibong resulta.
Ayon sa source, ang nasabing desisyon ng PhilHealth management ay dahil sa pilipit na posisyon ni Interim/OIC President De la Serna.
Gusto raw kasi ni De la Serna na ‘disiplinahin’ sila bunsod ng kanilang facebook posts laban sa kanya.
Mukhang na-rally naman ang ilang appointive Board members ng Interim/OIC President and CEO kaya noong 18 Enero 2018, ang 17 empleyado ay nakatanggap ng letters of termination, nag-aabiso na ang kanilang casual employment ay hanggang 31 Enero 2018 na lamang.
Ang nasabing abiso ay nilagdaan ng Interim/OIC president ng PhilHealth.
Nagtataka tayo kung bakit ganoon na lamang ang panggagalaiti ni De La Serna sa mga post sa social media ng mga empleyado.
Mayroon bang nasaling sa kanyang pride na kanyang ikinagalit?!
Kung ang post sa social media ay tungkol sa civil service issues, ano ang dapat ikagalit si Madam De la Serna?!
Sa susunod, ‘yan po ang tatalakayin natin.
KAGUTUMAN
NAPANSIN NA
NG PALASYO
MISMONG ang Malacañang ay nangangamba na rin sa gutom na nararanasan ng iba nating mga kababayan.
At sa estadistika, lumaki ng bilang ng mga nakararanas ng involuntary hunger noong Disyembre 2017.
Ayon sa Social Weather Station (SWS) tinatayang 3.6 milyong pamilyang Filipino ang nakaranas ng kagutuman nitong nakaraang Disyembre.
Nabatid din sa SWS survey, na isinagawa nong 8-16 Disyembre, 15.9 percent ng mga respondent ay nagsabing nakararanas sila ng gutom.
Noong Setyembre, umabot sa 4.1 puntos na mas mataas sa 11.8% puntos o 2.7 milyong pamilya.
Ayon kay Presidential spokesperson, Secretary Harry Roque, mahigpit na nagtatrabaho ang gobyerno para tulungan ang mga mamamayan.
“We’re expanding economic opportunities in agriculture, forestry, fishery sector to address the challenges of food security, while improving our people’s income earning ability, enhancing workers’ employability through Tesda’s skills upgrade program.”
Bukod sa mga nabanggit ni Roque, ang administrasyon umano ay nakapagbibigay ng educational, livelihood at health assistance sa mahihirap at marginalized sectors, at social pension para sa senior citizens at iba pang indigent.
Naglulunsad din umano ng supplementary feeding program para sa mahihirap na estudyante.
Sabi ng SWS ang kagutuman ay umabot sa 14.7 percent (457,000 pamilya) sa Metro Manila nitong Disyembre mula 11.7% (364,000 families); 17.7 % (1.8 million families) mula sa 13.8 (1.4 million) percent sa Luzon; 13.3 percent (589,000 families) mula 9.7 percent (427,000 families) sa Visayas; at 15.3 percent (802,000 families) mula 9.7 percent (506,000 families) sa Mindanao.
Sa mga estadistikang nabanggit sa itaas, ano ang magiging hakbang ng palasyo upang tugunan ang kagutuman na nararanasan ng ating mga kababayan?!
Sana ay hindi lang sa press briefing sa Malacañang nasasagot ang mga tanong na ito.
Maging totoo sana ang mga kasagutan paglabas sa Palasyo ng mga kinauukulang opisyal.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap