KRITIKAL ang kalagayan sa pagamutan ng isang lalaking nangungupahan makaraan pagtatagain ng kanyang kasero, ama ng babaeng kanyang tinangkang gahasain sa Valenzuela City, kahapon ng umaga.
Nilalapatan ng lunas sa Valenzuela Medical Center ang suspek na si Paulo Estrada, 35, na-ngungupahan sa isang kuwarto sa 85-A San Andres, Brgy. Karuhatan ng nasabing lungsod.
Batay sa ulat ni Valenzuela Police deputy chief for operation Supt. Rey Medina, dakong 5:00 am nang mangyari ang insidente.
Ayon sa salaysay ng biktimang si Rose, makaraan siyang maligo, narinig niyang may humihilik sa ilalim ng kanyang kama.
Nang sumilip si Rose sa ilalim ng kama ay nagulat siya nang makita si Estrada na maaaring nakatulog sa paghihintay sa kanya.
Bunsod nito, tumakbo palabas ng silid ang biktima at nagsumbong sa kanyang 65-anyos ama.
Armado ng itak, tinungo ng ama ang silid ng anak at nasalubong ang suspek na armado ng patalim.
Bago nakaporma ang suspek ay mabilis siyang pinagtataga ng ama ng biktima.
(ROMMEL SALES)
