NAGTAPOS na ang 2nd batch ng drug rehab patients ng Community Assisted Rehabilitation and Recovery of Out-patient Training System (CARROTS), isang programa ng Caloocan Anti-Drug Abuse Council (CADAC), sa pakikipagtulungan ng simbahan.
Malugod na binati ni Mayor Oscar Malapitan ang 107 nagsipagtapos sa gamutan at training mula sa tatlong “pods” o silungan ng surrenderees – Ang Our Lady of Lourdes sa Camarin, Our Lady of Lujan sa Bagong Barrio, at sa San Roque Parish sa A. Mabini.
Sinaksihan ang masayang pagtitipon ng mga pamilya ng drug rehab patients at nina Caloocan Bishop Pablo David, Vice Mayor Maca Asistio III, Caloocan Police chief Senior Supt. Jemar Modequillo, PDEA agent Joshua Arquero, former CHR Chairperson Etta Rozales, at mga barangay chairman ng lungsod.
Ayon kay Mayor Ma-lapitan, “hindi pa nagtatapos dito ang kanilang pagbabagong-buhay. Sa Caloocan, matapos ang kanilang graduation ay mayroong 10 buwan hanggang dalawang taon na ‘after care services’ upang tiyakin ang suporta ng pamilya at kanilang pagbabalik sa mainstream society, upang hindi na muling bumalik pa sa mapanirang bisyo.”
“Ang 107 nasa harapan natin ngayon ay su-nod-sunod na nag-negative sa resulta ng kanilang linggohang drug test. Ibig sabihin nito, kung may matibay na pagpapas-yang magbagong buhay ang pasyente… tiyak na gagaling sila mula sa pagka-adik sa masamang bisyo.
Congratulations sa inyo… isa na kayong produktibong kabahagi ng ating komunidad. Sana ay tuloy-tuloy ang inyong produktibong pagbabago,” dagdag ng alkalde.
Inaasahang mas marami ang magtatapos sa 3rd batch sa CARROTS rehab program dahil magiging anim na simbahan na ang kukupkop sa surrenderees.
Ang mga nadagdag na tatlong simbahan ay Sta. Quiteria Parish, Holy Cross Parish sa Amparo, at Sto. Niño Parish sa Bagong Silang.
(JUN DAVID)
