Alfred Vargas, thankful sa Ang Guro Kong ‘Di Marunong Magbasa

NAPAKA-POWERFUL ng mensahe ng pelikulang Ang Guro Kong ‘Di Marunong Magbasa. Ito ang saad ni Congressman Alfred Vargas na siyang bida sa pelikulang ito na entry sa darating na Cinemalaya Film festival na magaganap sa August 4-13.

Ito’y magkakaroon ng nationwide commercial release sa September 20.

“Very powerful iyong mo-vie and one of the strengths of this movie is that malinaw na malinaw iyong message. Actually, usually ‘yung mga movie ang ganda-ganda, pero at the end of the film ay mapapatanong ka minsan e, ‘Ang ganda ng pelikula, pero, ano ang ibig sabihin ng movie?’

“Dito in fairness to Direk Perry, malinaw na malinaw ang mensahe. I know after the mo-vie, mayroong powerful na emotions kayong mararamdaman. Iyon, I guarantee,” saad ni Alfred.

Ang pelikula na pinamahalaan at isinulat ni Direk Perry Escaño ay ukol sa pagpapahalaga sa edukasyon. Si Aaquil (Alfred) ay isang magsasaka sa liblib na lugar na napilitang maging guro sa mga bata, kahit na siya ay isang no-read no write dahil hindi man lang nakatuntong kahit Grade-1.

Ngunit, bukod sa kahirapan, makikita rin dito na sagwil sa edukasyong minimithi ng mga kabataan ang peace and order situation at korupsiyon sa pa-mahalaan. Kaya ang iba sa kanila ay naging child warrior, humawak ng baril at pumatay ng kapwa, kahit sila ay mga bata pa lamang.

Saad ni Alfred, “Ang purpose ng pelikulang ito ay to advocate, to inform… Naalala ko ang sabi sa akin ng nanay ko na, ‘Huwag kang matatakot at huwag kang mahihiyang gumawa nang tama.’ Ibang-iba ‘yung satisfaction saka fulfillment ko sa movies, so ako, thank you Lord.”

Nang natanong kung plano ba niyang tumakbo sa higher position, ito ang tugon niya, “Actually, this is enough na rin for me, siguro ‘pag matapos ko ‘yung three terms ko, magbabalik showbiz na ako, feeling ko naman nag-make rin na ako ng difference. Siguro kapag sa tingin ko ay sapat na ‘yung nagawa ko, tingin ko babalik na lang ako sa showbiz. Para at least ‘di ba… sana balang araw maging Eddie Garcia ako ‘di ba? Iyong tumanda ako bilang artista, kasi passion natin e.”

Tampok din sa pelikula sina Mon Confiado, James Blanco, Miggs Cuaderno, Marc Justine Alvarez, Lou Veloso, Micko Laurente, Kiko Matos, Loren Burgos, Paul Sy, at iba pa.

 

ALAM MO NA! – Nonie V. Nicasio