MAUBAN, Quezon – Patay ang isang sundalo makaraan makasagupa ang mga miyembro ng New People’s Army sa bayang ito, nitong Lunes ng umaga.
Nagpapatrolya ang Alpha Company ng 76th Infantry Batallion ng militar, nang makasagupa nila ang nasa pitong rebelde sa Brgy. Cagsiay 2.
Makalipas ang 10 minutong bakbakan, dumating ang dagdag-puwersa ng mga sundalo at pulis, dahilan para umatras ang mga NPA.
Napatay sa bakbakan si Corporal Argel Joseph Dela Cruz.
Pinaniniwalaang napatay rin ang ilang rebelde dahil sa mga bakas ng dugo sa kanilang posisyon.
Patuloy na tinutugis ng militar ang mga nakatakas na rebelde.
Nito lamang nakaraang linggo, inatake ng NPA ang mga tropa ng pamahalaan sa ilang lalawigan.
Bunsod nito, dalawang miyembro ng Philippine Marines ang napatay sa Palawan, habang apat Presidential Security Group (PSG) officers ang nasugatan sa Cotabato.
