HATAW! D'yaryo ng Bayan hatawtabloid.com
MULING nakuha ni Kathryn Bernardo ang no. 1 spot sa Yes! 100 Most Beautiful Stars 2017 na una niyang nakopo noong Hunyo 2013 kasama si Julia Montes. Muli, may kasama siya sa cover ng Yes! Magazine, ang kanyang real at reel loveteam, si Daniel Padilla. Sina Kathryn at Daniel ang itinanghal na pinakamaganda at guwapong artista para sa taong ito.
Ayon kay Kathryn, akala niyaý hindi sila ang cover dahil ang alam niyaý isang beses lang puwede. “Pero, I’m very thankful, kasi ngayon I’m sharing this cover with DJ and ‘yun napakalaking bagay niyon. So I’m thankful sa Yes! talaga.”
Ang magaling na photographer na si Mark Nicdao ang kumuha ng mga retrato sa dalawa na para maipakita ang kanilang kilig mode ay nag-asaran muna.
“Paano ko siya pakiligin? Inaasar ko lang siya,” natatawang sambit ni DJ. “Bina-badtrip ko lang siya. Ganoon ang kulitan naming, bad-tripan lang kami nang bad-tripan. Para may something lang lagi.”
Alam naman ni Kathryn na ang pag-aasar ni Daniel sa kanya ay paraan ng paglalambing sa kanya. “Alam namin ýung timpla ng isa’t isa. Magkaibang-magkaiba kami ni DJ off cam, pero kapag magkasama kami, nagbi-blend pa rin kami. Siguro ýon ýung pinaka-secret doon, huwag kang magtago sa mga tao. Kasi kung ano ‘yung nakikita nila sa camera, ganoon din kami kakulit off-cam.”
Sa kabilang banda, muling inulit ni Daniel ang sinabi noon nito sa mga interbyu sa kanila ukol sa tunay nilang relasyon ng dalaga. “Kitang-kita naman na. Parang ano pa bang kailangang sabihin? Wala na. Hindi na kailangang magsalita pa. Masyado nang klaro ýung mensahe na ipinararating namin.”
Gusto namang maging pribado ni Kathryn ukol sa bagay na ito. “Kasi public figures kami, so parang lahat naman, alam na ng tao. Very private ako na tao, so may mga bagay na ayokong ibigay lahat ng details. Ayoko na i-explain. Basta bahala na kung anong isipin, pero ýon ang importante sa akin.”
Samantala, kung gusto naman ninyong malaman kung sino pa ang ibang artistang nakasama nina Kathryn at Daniel sa 100 Most Beautiful Stars ng Yes! Bumili na kayo ng kopya nito sa mga newsstand, bookstores at supermarkets.
SHOWBIZ KONEK – Maricris Valdez Nicasio
