HATAW! D'yaryo ng Bayan hatawtabloid.com
TATANGKAING bumalikwas ng Cleveland Cavaliers habang susubukang lumayo ng Golden State Warrior sa kanilang muling harapan sa Game 2 ng best-of-7 NBA Finals ngayon sa Oracle Arena sa Bay Area.
Ibinaon ng Warrios ang Cavs sa Game 1 para sa kanilang ika-13 sunod na panalo sa playoffs. Buhat nang magsimula ang post-season, hindi pa nadudungisan ang Warriors.
Muli silang sasandal sa bagong puwersa at dating MVP na si Kevin Durant na kumana ng 38 puntos, 8 rebounds at 8 assists noong Game 1.
Susuporta sa kanya ang 2-time reigning MVP na si Stephen Curry na nagbuslo ng 29 puntos.
Samantala, susubukang itabla ng Cleveland ang serye sa 1-1 sa likod ng kanilang punong kabalyero na si LeBron James.
Bagamat may 8 turnovers, bumandera si James para sa Cavs sa kanyang 28 puntos, 15 rebounds at 8 assists. Makakaasa siya sa kasanggang si Kyrie Irving na kumonekta ng 24 puntos.
Tutulak ang serye sa Quicken Loans Arena sa Cleveland, Ohio para sa Games 3 at 4 bago bumalik sa Oracle Arena na bahay ng Golden State sa Game 5 kung sakaling kinakailangan pa.
Hangad ng Warriors ang ikalawang titulo sa tatlong taon habang back-to-back championships naman ang habol ng Cavs.
Ito na ang kanilang ikatlong sunod na tapatan sa Finals. Nagwagi ang Golden State noong 2015 bago nakaresbak ang Cleveland noong 2016. (JBU)
