Bebot tumawid sa riles sapol ng PNR train (May kahuntahan sa cellphone)
NALASOG ang katawan at halos hindi na makilala ang isang parlorista makaraang masagasaan at makaladkad ng rumaragasang tren ng Philippine National Railways (PNR) sa Sampaloc, Maynila, kamakalawa ng gabi.
Kinilala ni S/Insp. Arnold Sandoval ng Manila District-Traffic Enforcement Unit (MD-TEU), ang biktimang si Marvic dela Cruz, 34, ng Phase 5, Block 15, Lot 37, Towerville, Minuyan Proper, San Jose Del Monte, Bulacan, agad binawian ng buhay sa insidente.
Ayon sa ulat, naganap ang insidente dakong 7:15 pm sa southbound ng Maria Clara St., kanto ng Antipolo St., sa Sampaloc.
Naglalakad ang biktima sa riles at may kausap sa cellphone kaya’t hindi napansin ang paparating na tren hanggang siya ay nasagasaan.
Samantala, sinabi ni Aejon Catura, driver ng tren, papalapit na sila sa lugar nang biglang tumawid ang biktima.
Tinangka ng driver na mag-emergency break ngunit hindi kinaya kaya nahagip ang biktima. (BRIAN GEM BILASANO)
