2 sangkot sa droga todas sa pulis
PATAY ang dalawang lalaking kabilang sa drug watchlist ng pulisya, makaraan makipagbarilan sa mga awtoridad sa anti-criminality operation habang natagpuan ang bangkay ng hindi nakilalang lalaking hinihinalang biktima ng summary execution sa Navotas City.
Ayon kay Senior Supt. Dante Novicio, hepe ng Navotas Police, dakong 2:00 am nang magsagawa ng anti-criminality operation ang pinagsanib na puwersa ng NPD-DPSB, PCP-3, SIB at SAID-SOTG sa Brgy. North Bay Boulevard North ngunit nakatunog ang suspek kaya nakipagpalitan ng putok na kanyang ikinamatay.
Sa kabilang dako, nakipagbarilan sa mga tauhan ng SIB sa anti-criminality operation sa Alley Lacson, Brgy. NBBN ang isang alyas Ron-Ron na nagresulta sa agaran niyang kamatayan.
Nauna rito, dakong 11:55 pm nitong Martes, natagpuan sa C-3 Road, Brgy. North Bay Boulevard South ang bangkay ng hindi kilalang lalaki na may dalawang tama ng bala sa ulo. (ROMMEL SALES)
