Maging ligtas kaya sa masasamang intensiyon ang Presidential Task Force for Media Security?

HINDI na bago sa inyong lingkod itong pagbubuo ng mga Task Force para umano sa kaligtasan at proteksiyon ng media practitioners.

Tuwing bago ang administrasyon, laging may bagong task force.

Pero sa totoo lang, pangalan at tao lang naman ang nababago. Ang kondukta ng organisasyon ay ganoon pa rin, walang nagbabago.

Kaya hindi tayo nagtataka kung bakit paulit-ulit lang din ang nararanasan ng mga taga-media.

Wish lang natin na huwag nang maulit sa ibang mga kasamahan natin sa  media ang naganap sa atin noong 2015 na naaresto tayo isang araw ng Linggo (Easter Sunday) dahil sa kasong libel.

Mariing binatikos ng NUJP at ng International Center for Journalists (ICFJ) ang ginawang pag-aresto ng pulis-Maynila sa inyong lingkod. Sila ay maigting na pumuna sa press freedom attack.

Pero sa huli, pinalabas ng mga elementong gigil na ipaaresto ang inyong lingkod na kami ang mali at may kasalanan kung bakit naaresto isang araw ng Linggo sa isang gawa-gawa imbestigasyon kuno.

Wattafak!?

Ang mga pasimuno at kasabwat nito ay buhay pa at kikisaw-kisaw pa sa tabi-tabi. Parang mga uod na ut-ut nang ut-ut ng mga mismis mula sa mga buwitre.

Ganitong klase ng harassment ang ginagawa ng isang pulis para pahirapan at pahiyain ang isang media person.

Kaya naman, wish lang natin na huwag sanang magkaanay ang Presidential Task Force for Media Security.

Sapagkat ang kasabwat ng mga press freedom attackers ay nariyan lang sa tabi-tabi.

‘Yun lang po.

KAPANGYARIHAN NA MAKAPAGHAIN
NG SUBPOENA NAIS IGAWAD SA PNP-CIDG
NG ISANG MAMBABATAS

NAGHAIN ng panukalang batas si Surigao de l Norte Representative Francisco Jose Matugas II para bigyan ng kapangyarihan ang PNP Criminal Investigation & Detection Group (CIDG) na makapag-isyu ng subpoena/subpoena duces tecum.

Ito raw kasi ang isa sa mga dahilan kung bakit nahihirapan ang mga taga-PNP-CIDG na imbestigahan ang isang kaso o krimen.

Makitid kasi ang kanilang kapangyarihan. Kaya hindi nila maipatawag ang mga kaukulang tao na makatutulong para pagtibayin ang ebidensiya sa isang krimen o isang kaso.

Ayon kay Rep. Matugas ang kanyang House Bill No. 2993, ay makatutulong para mapabilis ng PNP-CIDG ang kanilang trabaho.

Aniya, ang PNP-CIDG, ay may malaking maitutulong sa Duterte administration sa giyera laban sa ilegal na droga.

Ani Matugas, sa ilalim ng Republic Act 6975, na lumikha sa PNP, hinid nito binigyan ng kapangyarihan ang CIDG na makapag-isyu ng subpoena at subpoena duces tecum.

Habang ang National Bureau of Investigation (NBI), Office of the Ombudsman, Department of Justice, Philippine Drug Enforcement Agency, National Police Commission, Bureau of Internal Revenue, at ang Cybercrime Operation Center ng Cybercrime Investigation Coordination Center ay pinapayagang mag-isyu ng subpoena bakit ang CIDG nga naman ay hindi?!

Palagay natin ay lohikal ang panukalang batas na ito ni Rep. Matugas.

At bilang isang mamamayan na kumikilala sa batas at kapangyarihan ng mga alagad ng batas, naniniwala tayo na dapat aprubahan ng Mababang Kapulungan ang panukalang batas ni Rep. Matugas.

Suportahan ta ka diyan, Congressman!

25K TONG KADA LINGGO
SA PCP LAWTON

GOOD PM sir Jerry, ‘yan pong ILLEGAL TERMINAL sa Lawton ay hndi mapapaalis dahil may 25K na parating sa PCP Lawton kada linggo. Santambak na rin ang kolorum van diyan. May partikular pa raw ang hepe diyan.

+639189622 – – – –

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap