INAALAM ng pamunuan ng Pambansang Pulisya ang mga lumabas na balitang nagtangkang magpakatay ang aktor na si Mark Anthony Fernandez sa loob ng Pampanga Provincial Jail.
Ayon sa isang insider mula sa Angeles City regional trial court (RTC), tinangka ng 37-anyos aktor na maglaslas ng pulso sa pamamagitan ng gunting.
Ang gunting ay sinasabing kinuha ng aktor mula sa isang barbero noong siya ay nagpagupit.
Ito ang sinasabing dahilan kung bakit may suot ang aktor na bandage sa kanyang pulso, taliwas sa mga unang report na nagkaroon siya ng pinsala dahil sa paglalaro ng basketball.
Habang sinabi ni Prosecutor Mark Oliver Sison, ang tangkang pagpapakamatay ng aktor kung totoo man ay posibleng may kinalaman sa mga kasong isinampa laban sa kanya.
Magugunitang naaresto si Fernandez noong nakaraang buwan nang mahulihan ng halos isang kilong marijuana sa kanyang Ford Mustang.
Bukod sa kasong may kinalaman sa droga, nahaharap din ang aktor sa kasong civil disobedience nang takbuhan ang mga pulis na nagsasagawa ng checkpoint operation.
