HATAW! D'yaryo ng Bayan hatawtabloid.com
ISINAPUBLIKO ng talent manager ni Dennis Trillo ang resulta ng drug test ng aktor.
Ito ay sa harap ng alegasyon ng PNP na may celebrities na sangkot sa ilegal na droga.
Sa Instagram account ng talent manager ni Dennis na si Popoy Caritativo, ini-post niya ang kopya ng resulta ng drug test ng aktor.
Makikita rito na pumasa ang 35-anyos aktor sa test sa Tetrahydrocannabinol at Methamphetamine o shabu.
May caption ang post ng talent manager na “In our efforts to show support for the government’s campaign against illegal drugs, Luminary Talent Management has taken the initiative to have our talents tested.”
Bukod kay Trillo, una nang nagboluntaryong nagpa-drug test sina Solenn Heussaff, Patrick Garcia, Luis Manzano, Baron Giesler at Claudine Barretto at pawang negatibo ang resulta ng test.
54 CELEBRITES NASA DRUG LIST – PNP
IBINUNYAG ng National Capital Region Police Office (NCRPO), 54 celebrities ang kabilang sa kanilang updated drug list.
Ayon kay NCRPO director, Chief Superintendent Oscar Albayalde, ang mga naidagdag sa listahan ay base sa impormasyon na galing kina Sabrina M at Krista Miller na una nang naaresto ng Quezon City Police District Office dahil sa ilegal na droga.
Ngunit tumanggi si Albayalde na isapubliko ang pangalan ng celebrities dahil iba-validate pa nila ang listahan.
“These are all being subjected to validation,” paglilinaw ni Albayalde.
Sinabi ng NCRPO, karamihan sa celebrities na nasa drug list ay gumagamit ng shabu, cocaine at party drugs.
Nagbabala si Albayalde, posibleng madagdagan pa ang bilang ng mga nasa listahan habang patuloy ang drug operation na isinasagawa ng mga awtoridad sa Metro Manila.
“Every time we make arrests, more names are being included because they were all telling us the persons they transact with,” ani Albayalde.
Dagdag ng NCRPO chief, hindi pa kasali sa listahan ang aktor na si Mark Anthony Fernandez na nahulihan ng halos isang kilong marijuana noong nakaraang linggo.
