Ama pinugutan, tsinaptsap ng anak (Ayaw pumayag sa kasal)

ROXAS CITY – Nagsisisi ang suspek na responsable sa pagpugot sa ulo at pagtsap-tsap sa katawan ng kanyang ama sa Brgy. Agcagay, Jamindan, Capiz.

Sinabi ni Nick Ocate, nasa tamang katinuan siya nang nangyari ang krimen at dumilim lamang ang kanyang paningin nang hindi pumayag ang kanyang mga magulang na magpakasal siya sa kanyang kasintahan dahil magkaiba ang kanilang relihiyon.

Samantala, halos hindi makapaniwala ang ina na si Editha sa sinapit ng kanyang mister na si Jose Ocate sa mga kamay ng kanilang anak.

Wala aniyang pinagtalunan ang mag-ama at nagulat na lamang nang biglang pumunta sa garahe ng kanilang bahay ang suspek at kumuha ng itak.

Agad bumaba sa kanilang bahay ang amang si Jose upang makaiwas ngunit hinabol ng suspek at pinagtataga.

Sa pagresponde ng mga pulis, nakita nila ang suspek na bitbit ang pugot na ulo ng ama. Hindi siya lumaban sa mga awtoridad at kusang sumama.

Natagpuan sa pinangyarihan ng krimen ang pira-pirasong katawan ng biktima.

Nasa kustodiya ng Jamindan Municipal Police Station ang naturang suspek.

Napag-alaman, bago nangyari ang krimen, ilang araw siyang kinokombinsi ng kanyang mga magulang na magpatingin sa psychiatrist sa lungsod.

Aminado ang suspek na paminsan-minsan ay nakararamdam siya ng pagkahilo makaraan mabagok ang kanyang ulo sa upuan ng kanilang simbahan.