HATAW! D'yaryo ng Bayan hatawtabloid.com
NAKAHUNTAHAN namin ang guwapitong young actor na si Grae Fernandez sa ginanap na The PEP List Year-3 Awards Night. Dito’y kasama niya ang young actress na si Andrea Brillantes, kaya inusisa namin si Grae kung sila na ba ang susunod na pagtatambalin ng ABS CBN?
“Hindi ko pa po iyon masabi e. Bale, ngayon po kami magkasama dahil presentor kami rito,” saad ng young actor.
Paano kung gawin kayong maging love team ni Andrea?
Sagot ni Grae, “Okay lang po, kasi kaibigan ko naman siyang matalik kaya okay lang po kung pagtatambalin kami ni Andrea.”
Isa si Grae sa mga young actor na tinitilian ng maraming kabataan na kabilang sa sikat na grupong Gimme 5. Ang iba pang miyembro nito ay sina Nash Aguas, Joaquin Reyes, John Bermundo, at Brace Arquiza.
Ang huling project niya sa ABS CBN ay ang big hit na remake ng Pangako Sa ‘Yo na tinampukan nina Kathryn Bernardo, Daniel Padilla, Ian Veneracion, at Jodi Sta. Maria. Ayon kay Grae, sa bandang November this year ay magkakaroon ulit siya ng teleserye sa Kapamilya Network.
“Sa November po ay magkakaroon ako ng teleserye. Pero wala pa pong mga detail about doon sa project,” nakangiting saad ng 14 year old na anak ni Mark Anthony Fernandez.
Ano ba ang gusto mong maging career path talaga, acting or singing?
“Acting po talaga ang gusto ko, iyon pong singing ay parang sa side lang iyon. Parang second craft ko na lang po ito. Nag-eenjoy naman ako sa aking career ngayon.”
Ano ang message mo sa fans ninyo?
“Siyempre po, maraming-maraming salamat po sa kanilang lahat, sa lahat ng fans namin at sana ay suportahan pa nila kami lalo, kaming lahat po.”
ALAM MO NA! – Nonie V. Nicasio
