HATAW! D'yaryo ng Bayan hatawtabloid.com
CAUAYAN CITY, Isabela – Binawian ng buhay ang isang kawani ng Department of Environment and Natural Resources (DENR) makaraan masangkot sa aksidente sa lansangan kamakalawa ng gabi sa bahagi ng Brgy. Busilac, Alfonso Lista, Ifugao.
Ang biktima ay si Jefferson Macadangdang, 26 anyos, residente ng nasabing lalawigan.
Batay sa paunang pagsisiyasat ng Alfonso Lista Police Station, sakay ng motorsiklo at habang binabagtas ng biktima ang lansangan sa kahabaan ng Sitio Kamanggaan, Brgy. Busilac, nang bumangga siya sa poste sa gilid ng lansangan.
Ang biktima ay nagkaroon nang malubhang sugat sa iba’t ibang bahagi ng kanyang katawan.
Bagama’t naisugod sa pagamutan, ang biktima ay idineklarang dead on arrival ng attending physician.
