KORONADAL CITY – Inaalam ang pagkakilanlan ng dalawang kasapi ng rebeldeng New People’s Army (NPA) na namatay sa magkasunod na enkwentro sa bayan ng Magpet, North Cotabato kamakalawa.
Ayon kay Captain Danny Boy A. Tapang, civil military operations officer ng 39th IB, Philippine Army, nakasagupa ng mga sundalo ang hindi pa malamang bilang ng mga rebelde dakong 4:40 am kamakalawa sa Sitio Lucuakon, Brgy. Balite at agad nasundan sa Sitio Boay-boay, Brgy. Basak sa nabanggit na bayan.
Ayon kay Tapang, ipinaalam sa kanila ng mga residente sa lugar ang presensiya ng mga armadong grupo na nananakot at nagsasagawa ng extortion activities kaya’t nagsagawa ng operasyon ang mga sundalo ng 39th IB.
Naging matagumpay ang nasabing operasyon na nagresulta sa pagkamatay ng dalawang hindi pa nakikilalang mga rebelde at pagkarekober ng isang high powered firearm, 19 improvised explosive devices (IEDs) at subersibong mga dokumento.
Walang nasugatan sa panig ng mga sundalo sa nasabing insidente.
