This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
NAKOMPISKA sa isang 23-anyos lalaki ang pitong kilo ng pinatuyong dahon ng marijuana habang nagpapatrolya ang mga tauhan ng Manila Action Special Assignment (MASA) sa Sta. Ana, Maynila kamakalawa ng gabi.
Kinilala ni Chief Insp. Bernabe Irinco Jr., ang suspek na si Jonathan Hulleza, walang asawa, service crew, residente ng 214 Brgy. Bahay Toro, Project 8, Quezon City.
Sa imbestigasyon ng pulisya, dakong 7:30 p.m. nang makompiska mula sa suspek ang pitong kilo ng marijuana na nagkakahalaga ng P 500,000, sa Pasig Line, Zamora St., Sta. Ana, Maynila.
Napag-alaman, nagpapatrolya ang mga tauhan ni Irinco nang may magbigay ng impormasyon na may bitbit na marijuana ang nasabing suspek.
Bunsod nito, sinita ng mga pulis ang suspek at nakompiska ang pitong kilo ng marijuana sa loob ng sako.
Ang suspek ay sasampahan ng paglabag sa R.A. 9165 (Dangerous Drugs Act) sa Manila City Prosecutor’s Office.
