This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
SWAK sa kulungan ang isang Nigerian businessman makaraan mahulihan ng mga awtoridad ng hindi nabatid na halaga ng shabu sa anti-illegal drug operation ng mga awtoridad sa Caloocan City kamakalawa ng gabi.
Kinilala ang suspek na si Didicus Ohaeri, 34, ng #773 Km. 17 Alabang, Zapote Road, Las Piñas City, nakompiskahan ng apat sachet ng shabu.
Ayon kay District Anti-Illegal Drugs of Northern Police District (DAID-NPD) Chief Insp. Ronald Perilla, dakong 6 p.m. nang magsagawa ng anti-illegal drug operation ang mga tauhan ng DAID.
Sa pangunguna ni SPO4 Rodney Esguerra, isinagawa ang operasyon sa harap ng Majestic Massage Parlor sa MacArthur Highway, Brgy. 78, makaraan makatanggap ng impormasyon hinggil sa ilegal na aktibidad na kinasasangkutan ng suspek na nagresulta sa kanyang pagkaaresto.
Nakipag-ugnayan na ang mga tauhan ng DAID sa Philippine Drug Enforcement Agency (PDEA) at National Bureau of Investigation (NBI) upang alamin kung may kaugnayan si Ohaeri sa big time drug syndicates.
Sa standard operating procedure, ipinaalam na ng pulisya sa Nigerian Embassy ang tungkol sa pagkakaaresto sa suspek na sinampahan ng kasong paglabag sa R.A, 9165 (Comprehensive Dangerous Drug Act of 2002) sa piskalya ng Caloocan City.
