This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PATAY ang isang hindi nakilalang lalaki nang masagasaan ng trailer truck habang tumatawid sa kalsada sa Valenzuela City kamakalawa ng hapon.
Hindi umabot nang buhay sa Valenzuela Medical Center sanhi ng pinsala sa ulo at katawan ang biktimang patuloy pa rin inaalam ng mga pulis ang pagkakilanlan.
Nakapiit sa Valenzuela City Police ang driver ng trailer truck (AUA-6712) na si Jonathan Behim, 35, ng 577 Camino Dela Cruz St., Guadalupe Nuevo, Makati City.
Ayon kay SPO2 Tirso Delina, dakong 3 p.m., minamaneho ni Behim ang trailer truck sa kahabaan ng McArthur Highway nang mapansin niya ang biktimang nakatayo sa gilid ng kalsada sa tapat ng Valenzuela City People’s Park.
Nang malapit na si Behim ay biglang tumawid ang biktima kaya sinubukan niyang iwasan ngunit nahagip pa rin ng truck at pumailalim sa gulong.
