This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
NAIPROKLAMA na ng Commission on Elections bilang umuupong National Board of Canvassers, ang 12 bagong halal na senador sa katatapos na May 9 elections, sa Philippine International Convention Center (PICC).
Nanguna si Senator Franklin Drilon na nakakuha ng higit 18 milyon boto.
Sa mga naiproklama, lima sa kanila ang first time o unang beses na uupo bilang senador.
Ito ay sina dating TESDA director general Joel Villanueva, eight division world champion at Sarangani Rep. Manny Pacquiao, Risa Hontiveros, Sherwin Gatchalian at dating Justice Sec. Leila de Lima.
Si De Lima ang ika-12 sa nahalal na mga senador.
Sinabi ni Comelec chairman Andres Bautista, nasa 1,332,973 boto ang lamang ni De Lima sa 13th place na si Francis Tolentino.
Sa ngayon, ayon kay Bautista, mayroon na lamang 1,211 boto ang hindi pa na-canvass ng National Board of Canvassers kaya hindi na ito makaaapekto sa lamang ni De Lima kay Tolentino.
Habang no-show sa ginanap na proklamasyon si Senator-elect Panfilo Lacson.
Magsisimula ang termino ng mga bagong halal na senador sa tanghali ng Hunyo 30 ng taon kasalukuyan.
Narito ang 12 bagong senador at ang bilang ng kanilang natanggap na boto: Franklin Drilon – 18,607,391; Joel Villanueva – 18,459,222; Vicente Sotto III – 17,200,371; Panfilo Lacosn – 16,926,152; Richard Gordon – 16,719,322; Juan Miguel Zubiri – 16,119,165; Manny Pacquiao – 16,090,546; Francis Pangilinan – 15,955,948; Risa Hontiveros – 15,915,213; Sherwin Gatchalian – 14,953,766; Ralph Recto – 14,271,866; at Leila de Lima – 14,144,070.
