This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
HALOS 80 pamilya ang nawalan ng tirahan nang tupukin ng apoy ang 40 bahay at dalawang residente ang nasugatan sa sunog sa isang residential area sa Makati City nitong Martes ng hapon.
Dalawang residente na hindi nabanggit ang pangalan ang dumanas ng 1st degree burns sa katawan na agad nilapatan ng lunas at dinala sa malapit na pagamutan.
Base sa inisyal na ulat ng Makati Fire Department, pasado 4 p.m. nagsimula ang sunog sa ikalawang palapag ng isang bahay sa Brgy. Pitogo dahil sa hinihinalang napabayaang nakasinding kandila o kalan.
Mabilis na kumalat ang apoy sa mga katabing bahay at umabot sa Task Force Delta ang alarma ng sunog.
Nagtulung-tulong ang 30 fire trucks na nagresponde sa lugar at naapula ang sunog bandang 6:28 p.m.
Patuloy na iniimbestigahan ng arson investigators ang sanhi ng sunog sa lugar at kung magkano ang kabuuang halaga nang natupok na mga ari-arian.
