Friday , March 29 2024

Mga berdugong pulis dalain

INARESTO kamakailan ng mga ahente ng National Bureau of Investigation (NBI) ang tatlong pulis at kanilang mga kasabwat na sangkot sa pamamaslang sa isang babaeng negosyante na ang katawan ay isinilid sa loob ng drum at itinapon sa Pasig River.

Ang naturang insidente ay magsilbi sanang pampagising sa sambayanan, lalo na sa mga opisyal ng gobyerno, sa katotohanan na hanggang ngayon ay may mga pulis na walang takot lumabag sa batas at gumawa ng kalokohan kahit makapatay pa sila.

Kinasuhan ng murder, kidnapping at serious illegal detention sina Inspector Elgie Jacobe, Police Officers 1 Mark Jay delos Santos at Edmon Gonzales na pawang miyembro ng National Capital Region Police Office, at ang kanilang mga kasabwat.

Dinukot at pinaslang nila umano si Adora Lazatin para mai-withdraw ang P200,000 mula sa bank account nito.

Ang tatlong pulis na dapat sana’y tumutupad sa tungkulin na pagsilbihan at protektahan ang mga mamamayan ay walang pakundangan na yumurak sa imahen ng PNP, na pilit bumabangon sa dinami-rami ng eskandalo na kinasangkutan nito.

Sinibak na sa serbisyo ang naturang mga pulis. Sa bigat ng kanilang kasalanan ay dapat mabulok na sila sa loob ng kulungan matapos mahatulan. Ito ang nararapat upang madala ang iba pang mga pulis at mapigilan sa paggawa ng kalokohan.

Mabuti na lang at NBI ang may hawak ng kaso dahil kung sa kapwa pulis ito napunta, ang pangamba ng marami ay palabas lang ang pagsasampa ng kaso at hindi magtatagal ay makababalik din sila sa kanilang puwesto.

Dapat salain nang husto ng PNP ang kanilang hanay upang masibak ang mga sangkot sa katiwalian at krimen. Tapusin na ang sistema ng palakasan at parusahan ang mga nakagawa ng kasalanan.

Kailangan din nilang higpitan ang pagtanggap ng mga baguhang pulis. Marami ang nakalulusot kahit may criminal record o kaya ay utak kriminal din, na gusto lamang maging pulis para maghari-harian at magkamal nang limpak-limpak na pera sa ilegal na paraan.

Ang pagiging pulis ay isang marangal na hanapbuhay. Pero nasisira ang larawan ng PNP at ng mga miyembro nito nang dahil lamang sa iilang scalawag na nakalusot maging pulis.   

Ito ang dapat lutasin ng PNP kung nais nilang maibalik ang respeto ng mga mamamayan sa ating pulisya.

***

SHORT BURSTS. Para sa mga komento o reaksiyon, mag-email [email protected] o mag-tweet sa @Side_View.

About Robert B. Roque, Jr.

Check Also

YANIG ni Bong Ramos

Riders at tricycle drivers, ‘suki’ ng traffic enforcers

YANIGni Bong Ramos KAHABAG-HABAG ang kalagayan ng riders at tricycle drivers dahil sila ay suking …

Dragon Lady Amor Virata

OIC chief of police, kapuri-puri

Isumbong mokay DRAGON LADYni Amor Virata HUMARAP kamakailan si OIC Chief of Police ng lungsod …

FIRING LINE ni Robert B. Roque, Jr.

Quiboloy, wanted dito at sa ibang bansa

FIRING LINEni Robert B. Roque, Jr. PARA sa isang sumusumpang inosente siya habang nagkukubli sa …

Dragon Lady Amor Virata

Negosyanteng intsik  inirereklamo ng mga empleyado

Isumbong mokay DRAGON LADYni Amor Virata INIREREKLAMO ng may 11 empleyado ang JUJU Mart na …

FIRING LINE ni Robert B. Roque, Jr.

Namamayagpag si Tulfo

FIRING LINEni Robert B. Roque, Jr. SA HULING survey ng WR Numero na ginawa noong …

Leave a Reply

Your email address will not be published. Required fields are marked *