This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
SWAK sa kulungan ang isang 34-anyos factory worker makaraan gapangin at halayin ang 16-anyos pamangkin ng kanyang live-in partner sa Caloocan City kamakalawa ng umaga.
Kinilala ang suspek na si Jonarie Bonganay, kinakasama ng tiyahin ng biktimang itinago sa pangalang Abby.
Lumabas sa imbestigasyon ni SPO2 Learni Albis, ng Women and Children’s Protection Desk (WCPD) ng Caloocan City Police, dakong 10 p.m. kamakalawa nang maganap ang panggagahasa ng suspek sa biktima.
Napag-alaman, nakahiga si Abby sa kanyang kuwarto sa kanilang bahay sa Sitio Mapalad Llano, Brgy.167 nang dumating ang lasing na suspek. Nilapitan ng suspek ang biktima at puwersahang hinalay.
Pagkaraan ay nagbanta ang suspek na may masamang mangyayari sa kanya at sa kanyang tiyahin kapag siya ay nagsumbong kaugnay sa insidente.
Ngunit pagkaraan ng insidente, inilahad ng biktima sa tiyahin ang insidente na nagresulta sa pagkakadakip sa suspek.
Ang suspek ay nahaharap sa kasong paglabag sa R.A. 8353 o Anti-Rape Law sa Caloocan City Prosecutor’s Office.
