This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
ARESTADO ang isang lalaki na nang-hostage ng isang bata makaraan mangholdap sa Brgy. Pinyahan, Quezon City nitong Linggo.
Sumiklab ang tensiyon sa eskinita ng NIA Road pasado 10 p.m. ng gabi nang sumampa sa bubungan ng isang pamilya ang suspek.
Armado ng patalim, ini-hostage ng lalaki ang 6-anyos bata.
Sinubukan pa ng barangay at pulisya na kausapin ang hostage taker ngunit kalauna’y napilitan silang magsagawa ng forced entry nang hindi na marinig ang boses ng bata.
Bago maghatinggabi, inilabas sa bahay ang musmos kasunod ng kanyang ina.
Tumagal pa ng ilang minuto bago nailabas ang nanlalabang suspek na si Arnulfo Recto.
“Matangkad [siya] na tao, malaking katawan kaya nahirapan kaming posasan siya. Lagpas 10 na kami roon e,” pahayag ni PO2 Juvencio Battung ng Quezon City police Station 10.
Sa East Avenue Hospital, sinipa ni Recto ang isang nurse na umaalalay sa paggamot sa kanya.
Ligtas ang bata na nagpapagaling sa nasabing ospital habang nahaharap sa patong-patong na kaso ang suspek.
