Negosyante patay, 8-anyos sugatan sa salpok ng kotse

PATAY ang isang negosyante habang sugatan ang isang 8-anyos batang babae nang salpukin ng isang sasakyan kahapon ng umaga sa Pasay City.

Agad binawian ng buhay bunsod nang matinding pinsala sa ulo at katawan si Mark Anthony Ventura, 32, ng Tramo 1, Parañaque City, lulan ng bisekleta nang salpukin ng kotse.

Sinalpok din ng kotse ang batang biktima habang naglalakad patungo sa kanilang eskwelahan.

Naisugod agad sa pagamutan ang batang si Nathalie, nag-aaral sa Rivera Village Elementary School, nagkaroon ng mga galos sa braso at bahagyang sugat sa ulo.

Nahaharap sa kasong reckless imprudence resulting in homicide, physical injury at damage to property si Raymal John De Luna, 25, ng Las Piñas City, driver ng Mitsubsishi Lancer.

Base sa ulat ng Pasay City Police, naganap ang insidente dakong 7:03 a.m. kahapon sa panulukan ng NAIA Road at 5th St., Brgy. 194 ng lungsod.

Agad sumuko sa mga awtoridad ang suspek makaraan ang insidente.