This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PATAY ang isang hindi nakilalang lalaki na sinasabing maysakit sa pag-iisip makaraang mabiktima ng hit and run ng isang puting sasakyan kahapon ng umaga sa Malabon City.
Ang biktimang tinatayang 43-anyos ay dinala na sa Eusebio Funeral Homes upang isailalim sa awtopsiya.
Kaugnay nito, nanawagan ang mga awtoridad kung sino man ang nakakita sa insidente at nakuha ang plate number ng isang puting L-300 van, maaaring makipag-ugnayan sa kanila upang makilala kung sino ang driver, gayondin sa mga kamag-anakan ng biktima upang mabigyan nang maayos na libing.
Ayon sa ulat ni Chief Insp. Romulo Maburang, ng Malabon City Traffic Police, dakong 5:30 a.m. nang maganap ang insidente sa McArthur Highway, kanto ng Durian St., Brgy. Potrero ng nasabing lungsod.
Palakad-lakad ang biktima sa naturang lugar nang mahagip nang humahagibis na puting L300 van na hindi nakuha ang plaka.
Imbes huminto upang tulungan ang biktima ay humarurot ang van at iniwan ang naghihingalong biktima na binawian ng buhay.
