HATAW! D'yaryo ng Bayan hatawtabloid.com
SA Linggo ay malalaman na kung kaya na bang tapatan ni Gregory Slaughgter si June Mar Fajardo.
Magkikita sa unang pagkakataon sa season na ito ang dalawang higante sa sagupaan ng Barangay Ginebra at defending champion San Miguel Beer sa Philsports Arena sa Pasig City.
Excited ang halos lahat sa salpukang ito. Kasi naman ay tila lumalabas na ang tunay na husay ni Slaughter sa ilalim ng bagong Barangay Ginebra coach na si Tim Cone.
Kung ipagkukumpara ang mga numero ng dalawang higanteng ito sa unang tatlong games nila sa Philippine Cup, aba’y mas maganda ang mga naitala ni Slaughter.
Ang problema nga lang ay natalo ang Gin Kings sa unang dalawang games nila at sa ikatlong laro kontra sa Alaska Milk sa Dubai ay bahagya lang silang nakaungos.
So, impresibo ang numero ni Slaighter pero hindi maganda ang performance ng kanyang koponan.
Sa kabilang dako, si Fajardo pa rin ang sukatan para sa mga big men lalo’t siya ang itinanghal na Most Valuable Player ng liga sa nakaraang dalawang seasons. Kaya naman siya ang talagang pinaghahandaan ng bawat makasagupa ng Beermen.
Katunayan, ang tsansa ng bawat makalaban ng San Miguel ay nakasalalay sa kung paano mapipigilan si Fajardo. Kapag napigilan ito, malamang na mapipigilan din ang koponan.
So, anong gagawin ni Slaughter laban kay Fajardo?
Actually, hindi na bago ang paghaharap nila. Maraming beses na silang nagtagpo sa Cebu. At sa unang yugto ng kanilang career, naungusan nga ni Slaughter si Fajardo. Nakahabol lang at nakaangat si Fajardo nang una siyang umakyat sa PBA.
Kaya naman inaasahang makakadikit din si Slaughter at muling magiging maigting ang duwelo ng mga higante.
SPORTS SHOCKED – Sabrina Pascua
