BUMAGSAK sa mga operatiba ng Quezon City Police District (QCPD) ang most wanted person sa Ilocos Norte na sangkot sa pagpaslang sa isang councilor sa bayan ng Currimao sa nabanggit na lalawigan.
Sa ulat ni Quezon City Police District (QCPD) director, Chief Supt. Edgardo Tinio, nadakip ng QCPD Anti-Carnapping Unit kamakalawa sa Cubao si Walter Taculma, 35, residente ng Brgy. Bimmanga, Currimao, Ilocos Norte.
Ayon kay Tinio, si Taculma ay dinakip sa bisa ng warrant of arrest na ipinalabas ng Regional Trial Court (RTC) Branch 18 ng Batac, Ilocos Norte.
Habang sinabi ni Chief Insp. Richard Ian Ang, hepe ng QCPD Anti-Carnapping Unit, isang impormante ang nagpunta sa kanyang opisina at ipinaalam na si Taculma ay nasa Camerino St., Cubao, Quezon City.
Agad nagresponde ang grupo ng ANCAR kasama ang ilang tauhan ng Criminal Investigation and Detection Group (CIDG) ng Ilocos Norte na pinangungunahan ni Chief Insp. Dennis Sumaliling, kaya nadakip ang suspek.
Idinagdag ni Tinio, si Taculma ay itinuturong sangkot sa pagpaslang kay Currimao, Ilocos Norte Councilor Estela Vidad noong Oktubre 27, 2010.
