This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
BUMUO agad ang Quezon City Police District (QCPD) ng Special Investigation Task Force (SITF) Jose para magsagawa ng malalimang imbestigasyon hinggil sa pagpaslang kay Jose Bernardo, reporter ng DWIZ at kolumnista ng Bandera Pilipino.
Ayon kay Chief Supt. Edgardo G. Tinio, QCPD director, si Sr. Supt Danilo Bautista, QCPD Deputy District Director for Administration (DDDA) ang mamuno sa Task Force habang pinangunahan naman ni Chief Insp. Rodel Marcelo, hepe ng Criminal Investigation and Detection Unit, ang pangangalap ng ebidensiya.
Anang opisyal, katuwang ng CIDU sa TF Jose ang Criminal Investigation and Detection Group Quezon City Field Office.
Ayon kay Marcelo, dalawang anggulo ang kanilang iimbestigahan para sa ikalulutas ng kaso. Aalamin nila kung ang pagpaslang ay may kaugnayan sa trabaho ng biktima o kung ito ay personal na away.
Ngunit ayon kay Marcelo, sa nakalap nilang impormasyon base sa ilang messages mula sa narekober na cellphone ng biktima, may kapalitan ng text message ang biktima hinggil sa isang negosyo ilang araw bago ang nangyaring krimen pero inaalam pa ng CIDU kung may kinalaman ito sa krimen.
Nilinaw ng opisyal na nangangalap pa sila ng ebidensiya kung may kinalaman sa krimen ang huling nakapalitan ng text message ng biktima. Aniya, hindi pa rin nila ikinokonsiderang suspek ang biktima.
Matatandaan, si Bernardo ay pinagbabaril ng isa sa dalawang suspek sakay ng motorsiklo nitong Oktubre 31, 2015 ng gabi sa harap ng isang fastfood sa Zabarte Road, Barangay Kaligayahan, QC.
