3 bagets sugatan sa ratrat ni lolo

SUGATAN ang isang dalagita at dalawang binatilyo makaraang pagbabarilin nang nagwalang lolo na napraning sa ingay ng mga biktima habang nagpapahinga sa Caloocan City kamakalawa ng gabi.

Pawang ginagamot sa Dr. Jose N. Rodriguez Memorial Hospital ang mga biktimang sina Angelica Espiritu, 15; Mark Rey Canoy, 13; at John Wilfredo Cado, 13, mga residente ng King Solomon St., Brgy. 174, Camarin, ng lungsod, tinamaan ng bala sa iba’t ibang bahagi ng kanilang katawan.

Habang pinaghahanap ang suspek na kinilalang si Ireneo Cantora, 65, ng Lot 12, Block 10A, King Solomon St., Brgy. 174, mabilis na tumakas makaraan ang insidente.

Batay sa ulat ni PO2 Mark Andrew Bartolome, naganap ang insidente dakong 10:30 p.m. sa King Solomon St.

Naglalakad pauwi ang mga biktimang maingay na naghaharutan nang biglang lumabas ng kanilang bahay ang suspek habang armado ng baril at sila ay pinaputukan.

Pagkaraan ay mabilis na tumakas ang suspek habang isinugod ng mga kaanak ang mga biktima sa pagamutan.