Aksiyon ng MPD sa hostage-taking idinepensa ng NCRPO chief

hataw tabloid October 10, 2015 News

101015 hostage bus PGH — ISANG BALA KA LANG. Hindi na pinatagal ng mga pulis-Maynila ang hostage taking kaya’t nang makakita nang tiyempo agad pinaputukan ang suspek (wala pang pagkakakilanlan – inset) kaya nakaligtas ang estudyanteng babae na kanyang hinablot at tinutukan sa loob ng bus na nakahinto sa tapat ng Philippine General Hospital (PGH) sa kanto ng Taft Ave., at Pedro Gil St., sa Ermita, Maynila. (BONG SON)

IDINEPENSA ni National Capital Region Police Office (NCRPO) chief, Chief Supt. Joel Pagdilao ang naging aksiyon ng mga tauhan ng Manila Police District na nagresponde sa insidente ng hostage-taking sa isang bus sa Maynila kamakalawa ng umaga.

Sinabi ni Pagdilao, tactical decision ang ginawa ng mga tauhan ng Manila Police District laban sa hostage taker.

Ayon sa heneral, mayroon silang protocol na sinusunod sa mga ganitong sitwasyon na ang prayoridad ay tiyakin ang kaligtasan ng biktima at isaalang-alang ang buhay.

Giit ni Pagdilao, kung nakikita ng tactical commander na nasa alanganin ang buhay ng isang hostage victim, kailangan na ang mabilis na pagpapasya sa susunod na aksiyon laban sa hostage taker.

Sa ulat ni Manila Police District chief, Chief Supt. Rolando Nana kay Pagdilao, nakita ng pulis na nalalagay na sa peligro ang buhay ng estudyanteng biktima kaya’t hindi na nagdalawang isip na i-neutralize ang suspek.

Sa kabila nang mabilis na pag-aksiyon ng MPD sa hostage taking incident, marami pa rin ang pumupuna sa pulisya.