35+ The Kuh Event ni Kuh, isang pop-inspirational concert

MAGTATANGHAL ng napakalaking concert sa Oktubre 16, 7:00 p.m. si Kuh Ledesma, ang 35+ The Kuh Event at makakasama niya rito ang mga kaibigan at kasabayan sa industriya tulad nina Gary Valenciano, Regine Velasquez-Alcasid, Jaya, at Tirso Cruz III.

Makakasama rin niya ang unica hija niyang si Isabella, si Migo ng Starstruck, at ang Perkins Twins na sina Jesse at Christian.

May espesyal din siyang panauhin, ”Ang isa sa mga guest ko ay si Fernando Carrillo na gumanap na Fernando Jose sa ‘Marimar’.”

Ang concert ay gagawin sa Christ’s Commission Fellowship (CCF) Center Main Auditorium sa Tiendesitas. ”Ito ang pinakamagandang auditorium dahil sa state of the art equipment at ang mga upuan ay first class. At home rin ako rito sa aking simbahan.

“Hindi ito isang all gospel show. Ito ay pop-inspirational, ngunit ito ay nakaaaliw at nakabubusog sa paningin. Kuwento ito ng buhay ko na nakalapat sa musika. Sa aking paglalakbay tungo sa makabuluhang buhay. Ang mahigit 35 taon ko sa showbusiness ay pinlano ng Diyos  at patuloy Niyang isinasaayos para sa kapurihan Niya sa katas-taasan,” giit ni Kuh.

Tara na at manood ng 35+ The KUHL Event. Makukuha ang mga ticket sa halagang P3,000, P2,500, P2,000 at P750. (Para sa inquiries at reservations, tumawag sa 531-0688 o sa 0917-8139065)

SHOWBIZ KONEK – Maricris Valdez Nicasio