Pinagkaisa sa Caloocan (Magkakaibang partido…)

ITO ang buong pagmamalaking sinabi ni Caloocan City Mayor Oscar Malapitan sa pormal na pagpapakilala sa kanyang mga makakasama sa halalan sa susunod na taon.

“Kung sa national ay nagbabangayan ang iba’t ibang political party, iba kami sa Caloocan dahil napagsama-sama natin ito sa partidong “Tao ang Una” na tayo ang nagtatag kasama ang mga kaibigan na katulad natin ay nagmamahal sa ating lungsod” sabi ni Malapitan.

Ang “Tao Ang Una” ay unang naging campaign slogan ni Malapitan nang tumakbo at manalo bilang alkalde ng lungsod noong nakaraang halalan.

Noong September 15, 2015 ay inaprubahan ng Comelec upang maging ganap na local political party. Kasama sa line-up ni Malapitan na miyembro ng United Nationalist Alliance (UNA) si Vice Mayor Macario Asistio III na kasapi ng Partido ng Masang Pilipino, Cong. Egay Erice ng Liberal Party at mga konsehal sa dalawang distrito na nagmula rin sa iba’t ibang magkakalabang partido.

Dumalo rin at nagpahayag ng suporta sa bagong partido ang mga dating magkakalabang mortal na sina dating Cong. Luis Baby Asistio at dating Mayor Rey Malonzo, gayon din si dating Vice Mayor Tito Varela.

Ayon kay Malapitan, ang pagsasama-sama ng mga dating magkakalabang politiko ay nagpapakita lamang na kontento sila at ang mamamayan sa kanyang pamumuno at ito umano ang magiging daan para sa patuloy ng pag-unlad ng lungsod.