This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
NAKIKIISA ang administrasyong Aquino sa sambayanang Filipino sa pagbubunyi sa Gilas Pilpinas sa pagsungkit sa silver medal sa katatapos na 2015 FIBA Asia championship sa Changsa, China.
Sinabi ni Communications Secretary Herminio Coloma Jr., sa kabuuan ng kanilang paglalaro, ipinakita ng Gilas Pilipinas ang kanilang tapang at determinasyon, at hinarap nila ang lahat ng mga pagsubok.
“Hindi sila nagpatinag at nagpasindak at nakipagsabayan sa kanilang mga katunggali sa lahat ng aspekto ng laro. Ipinakita nila ang natatanging uri ng paglalaro ng mga Filipino na magiting, marubdob, at puno ng puso na siyang dahilan upang umani ng paghanga at respeto mula sa mga pinakamagagaling na koponan sa Asya,” aniya.
Nananalig aniya ang Palasyo na bagama’t nagkaroon ng setback sa kanilang hangad na mag-qualify para sa 2016 Olympics, mayroon silang panibago pang pagkakataon sa darating na taon, at nananalig na sila ay makapapaglakas at makapagsasanay para matamo na ng pagbabalik ng Filipinas sa 2016 Rio de Janeiro Olympic Games.
“Kaya, muli, nakikiisa tayo sa pagsigaw ng ating mga mamamayan ng “Gilas Pilipinas, PUSO!” sabi pa ni Coloma.
