BINAWIAN ng buhay ang isang 65-anyos lolo makaraang mahulog sa hagdan dahil sa kalasingan kamakalawa ng gabi sa Tayuman, Tondo, Maynila. Namatay noon din ang biktimang si Antonio Espinar, alyas Tony, stay-in helper sa BKM House sa PNR Compound, Tayuman, Tondo, Maynila. Ayon sa imbestigasyon ni PO3 Noel Santiago, ng Manila Police District-Homicide Section, naganap ang insidente dakong 6:30 p.m. sa nabanggit na lugar. Bago ang insidente, nakitang nakikipag-inoman ang biktima sa kanyang mga kasamahan sa trabaho. Pagkaraan ay nakita ni Michael Paul Cruz, 28, ang nakahandusay at wala nang buhay na biktima malapit sa hagdanan. Pinaniniwalaang habang paakyat sa kanyang kuwarto ang biktima ay nahulog dahil sa kalasingan.
Post navigation
