Demolition job butata kay Sen. Sonny Trillanes

NANINIWALA si Senator Antonio “Sonny” Trillanes IV na malaki ang naitutulong sa kanyang mga programa ng kanyang consultants kaya sila naman ang kinakaladkad sa kontrobersiya bilang demolition job laban sa Senador.

Pero dahil walang katotohanan at hindi guilty, nanindigan si Senator Trillanes at tahasang ipinamukha sa mga kumakaladkad sa kanyang pangalan na iba siya sa kanila.

Aniya, “hindi ako katulad nilang magnanakaw na pati yaya iniaasa ang sahod sa pamahalaan…”

Aray! Ang sakit naman niyan.

Sinabi rin ni Senator Trillanes na kung talagang mayroon siyang pag-abuso sa paggamit ng kanyang pondo dapat sana ay pinadalhan na siya ng disallowance record ng Commission on Audit (COA).

Ngunit sa record ng COA ay wala siyang disallowance record.

Ito ang katotohanan sa likod ng demolition job na iniuupak ngayon kay Senator Trillanes.

Ultimo umano driver at kasambahay niya ay naka-payroll sa Senador at nakahanay umano sa kanyang consultants.

Ito ay bahagi ng kanilang consultancy rights o pribilehiyo bilang Senador.

Ayon kay Senator Trillanes, isang maliwanag na kasinungalingan ang mga ibinunyag ng taong nais na sumira sa kanyang malinis na pangalan.

Sa pagkakataong ito ay tahasang tinukoy ng Senador na si Vice President Jejomar “Jojo” Binay at kanyang mga kaalyado ang nasa likod ng demolisyon.

Karamihan sa consultants ni Sen. Trillanes ay katuwang niya sa pagpapatakbo ng kanyang mga programa lalo na noong nakakulong pa siya.

At dahil mapagkakatiwalaan at katuwang niya sa mga isinusulong niyang programa ay pinanatili sila ng Senador sa kanyang pool of consultants.

Legal at totoong consultants ang mga taong tumatanggap ng allowance mula sa pondo ng bayan.

Pero siyempre, hindi niya maaaring ibunyag sa publiko ang tunay na pagkatao nila para sa seguridad at confidentiality.

Ilan sa mga consultants ay nagsagawa ng imbestigasayon na nagresulta sa ilang mga ibinunyag nila sa pagdinig sa senado.

Hinamon ni Sen. Trillanes ang kampo ng mga Binay na kung talagang mayroon silang mga bayag ay mabuting humarap sila at sagutin ang mga akusayon ng korupsiyon laban sa kanila.

Sinabi ni Trillanes, sa susunod na pagdinig ng senado ay ibubunyag nila kung paano pinagkakitaan ng pamilya Binay ang janitorial at security services sa lungsod ng Makati.

Tsk tsk tsk…

May bago na naman palang pasabog na dapat mabatid ang publiko.

At ‘yan ang resulta ng trabaho ng mga consultant ni Senator Trillanes.

Kaya ‘yung mga walang magawa, tantanan ninyo si Senator Trillanes dahil tiyak na kayo’y mapapahiya!

[divider]

LP IPINAGTANGGOL NI PNOY LABAN SA PANINIRA UMANO KAY SEN. GRACE POE

MULI rin nanindigan ang Liberal Party (LP) sa pamamagitan ni Pangulong Benigno Aquino III na hindi sila ang nasa likod ng mga upak laban sa anak ni FPJ na si Sen. Grace Poe.

Gustong ipagdiinan ni PNoy na illogical ang pagsasabi ni Sen. Grace na mga kaalyado nila (LP) ang hindi tumitigil sa paninira at pang-aabala sa kanya.

Isa na nga rito ang kasong inihain ng isang Rizalito David sa Senate Electoral Tribunal (SET) na ipinadidiskuwalipika ang Senadora dahil siya ay hindi Filipino citizen.

Ayon kay PNoy, “Inaakit namin siya tapos gagawa kami ng black propaganda?” tanong niya sa mga mamamahayag sa Cebu City, kahapon.

Sa tono ng pananalita ni PNoy, gusto niyang sabihin na dahil papalapit na ang eleksiyon, panahon na naman ng siraan at batuhan ng putik.

Kaya panahon din daw ng katakot-takot na intriga, katakot-takot na disinformation.

At parang si Lola Nidora ni Yaya Dub na nagsabing, “lalabas din naman ‘yung katotohanan sa tamang panahon.”

Sa ikalawang pagkakataon din, muling idiniin ni PNoy ang kanyang endorsement kay outgoing DILG Secretary Mar Roxas bil;ang official standard bearer ng Liberal Party para ituloy ang ‘Daang Matuwid’ ng administrasyong Aquino.

Ang kahalagahan umano nito ay ituloy ang magandang pamamahala para sa kapakanan ng mga Filipino.

Tama si PNoy!

Sa mga susunod na araw tiyak na magiging mainit na ang upakan sa hanay ng mga politiko lalo sa mga mahihigpit na magkalaban.

Asahan natin batuhan ng putik ng magkakalabang grupo.

Tabi-tabi lang po at baka madamay kayo.

[divider]

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

[divider]

BULABUGIN – Jerry Yap