This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
INARESTO ng mga pulis ang isang dating call center agent na nagtangkang magpasagasa sa Metro Rail Transit (MRT) makaraan tatlong pasahero ang masugatan sa insidente sa Makati City, kamakalawa.
Si Mark Robert Connor, 31, ng 6945 Washington St., Brgy. Pio Del Pilar ng lungsod, ay nasa kustodiya na ng Makati City Police.
Habang ang nasugatang mga pasahero ay sina Elisa Aying, 45, ng Block 4, Lot 20, Istana Subdivision, Brgy. Malagasang, Imus, Cavite; Lolita Hermeginio, 60, biyuda, ng Masuso, Pandi, Bulacan, at Julie Ann Tentativa, 26, ng Ilaya, Barangka, Mandaluyong City.
Base sa reklamo ng Department of Transportation and Communication (DoTC), MRT 3, sa tanggapan ni Makati City Police chief, Sr. Supt. Ernesto Barlam, dakong 4 p.m. nang maganap ang insidente sa southbound lane ng MRT-Ayala Station ng naturang lungsod.
Salaysay ng gwardiyang si Robert Lee Reonal, habang siya ay naka-duty, nakita niyang nagtangkang tumalon ang suspek na si Connor ngunit nakapagpreno ang operator ng tren kaya hindi siya nahagip.
Ngunit dahil sa biglaang pagpreno ay nasubsob ang mga pasahero na ikinasugat ng tatlong biktima.
Si Connor ay dinala sa himpilan ng pulisya at sinampahan ng kasong alarm and scandal.
Habang ang mga sugatan ay dinala sa Ospital ng Makati upang malapatan ng lunas.
