LALARO uli si Marcus Douthit para sa Blackwater Sports sa darating na PBA Governors’ Cup na magsisimula sa Mayo 5.
Sinabi ng team owner ng Elite na si Dioceldo Sy na babalik si Douthit sa kanyang koponan pagkatapos ng kanyang paglalaro sa Sinag Pilipinas na sasabak sa SEABA at Southeast Asian Games na parehong gagawin sa Singapore.
Nag-average si Douthit ng 22.0 puntos, 14.4 rebounds at 3.1 na supalpal para sa Blackwater sa PBA Commissioner’s Cup kung saan ginulat ng Elite ang San Miguel Beer at Meralco kahit hindi sila nakapasok sa playoffs.
Tungkol sa Asian import, sinabi ni Sy na maghahanap siya ng kapalit pagkatapos na hindi payagan si Liu Cheng ng Chinese-Taipei na maglaro sa PBA dahil hindi siya binigyan ng release papers ng Taiwan Beer sa Super Basketball League (SBL).
(James Ty III)
