Mr. Goma mauna kang makigiyera sa Mindanao!

OPS… hindi po ako ang maysabi niyan.

Hamon ‘yan ni Bangsamoro National Movement for Peace and Development chairman Agakhan Sharief kay feeling congressman ‘este actor Richard ‘goma’ Gomez dahil sa patuloy na pambubuyo na maglunsad ng all-out war at ibasura umano ang Bangsamoro Basic Law (BBL).

Anak ng teteng, tulungan mong makaahon muna ang mga kababayan ng misis mong si Rep. Lucy Torres sa Leyte na sinalanta nang husto ng bagyong Yolanda bago umepal d’yan sa komplikadong usapin ng Bangsamoro.

E para ka naman palang echo no’ng isang convicted plunderer…

Tayo man ‘e maraming kuwestiyon diyan sa BBL. Pero hindi tayo mag-uudyok ng all-out war.

‘Yung Fallen 44 nga plus ‘yung 18 MILF member marami na ang sumakit ang dibdib, ‘yan pa kayang all-out war?!

Ang aktwal na giyera ay hindi games sa PSP, DOTA o Clash of Clans.

Hindi virtual ang buhay na iniaalay ng mga sundalo alang-alang sa bayan at ganoon din naman ang mga rebeldeng ipinakikipaglaban ang kanilang paniniwala at ideolohiya.

Naniniwala ang inyong lingkod na ano man ang paniniwala ng bawat isa ay sagrado pa rin ang buhay. Kaya walang karapatan ang sino man na magdeklara ng walang kapararakang giyera lalo pa’t maraming inosenteng buhay ang madadamay.

Kaya piece of advice lang feeling congressman ‘este’ matinee idol Goma, shut your mouth kung wala kang masasabing positibo…

Puwede ba?!

Ngayon kung hindi mo kayang itikom ang iyong bibig, uulitin ko lang, mag-armas ka, ikaw ang maunang pumunta sa Mindanao, ‘wag ‘yung mga sundalong ayaw ng gulo.”