Too late my hero pero sana ay makalusot ang Perpetual Disqualification Bill ni Sen. Miriam

 PARA hindi na raw makatakbo sa ano mang posisyon sa gobyerno ang sino mang nasentensiyahan sa kasong pandarambong (plunder), naghain ng Senate Bill 2568 si Senator Miriam Santiago.

Inihain ito ni Sen. Miriam nitong Enero 13, bago pa man katigan ng Korte Suprema ang argumento ng kampo ni Erap Estrada.

Gayon man, masasabi pa rin nating “too late” na ang panukalang batas dahil dalawang beses nang tumakbo sa halalan ang sentensiyadong mandarambong na si Erap Estrada.

Pero gusto pa rin nating matuloy at makalusot ang panukalang batas ni Senator Miriam dahil makatutulong ito para tuldukan ang walang pangalawang pang-aabuso ng ilang politiko na hindi nagsasawa sa ‘paglilingkod’ kuno sa bayan?!

Hanggang uugod-ugod na ‘e gusto pa rin kuno magserbisyo sa sambayanan.

Grabe di ba!?

Alam nating maraming politiko ang ngayo’y nasasangkot sa kasong plunder, kabilang na nga riyan ang dating Pangulong Gloria Macapagal Arroyo, at ang mga senador na sina Jinggoy Estrada, Bong Revilla at Juan Ponce Enrile.

S’yempre, numbers game na naman ito pagdating sa botohan sa Mababa at Mataas na Kapulungan ng Kongreso.

Sana lang ay huwag sumuko si Madam Miriam Santiago kapag isinusulong na ang panukalang batas.

Suportado ka namin at ng taumbayan d’yan Senadora Miriam.