[divider]
NAKATUTUWANG tuloy-tuloy ang pananagumpay ng Forevermore. Simula nang umere ang teleseryeng ito na pinagbibidahan nina Liza Soberano at Enrique Gil, lagi itong panalo sa ratings kahit first time lamang nagsama ang dalawa. Ibig sabihin, tanggap ng masa ang kanilang loveteam gayundin ang istorya nito.
Bagamat nagkaroon ng bagong katapat na programa ang Forevermore, hindi ito natinag dahil panalo pa rin sa labanan ng national TV ratings ang kilig-serye. Sa datos mula sa Kantar Media noong Lunes (Enero 5), nakakuha ng national TV rating na 23.6% ang Forevermore, o mahigit walong puntos na kalamangan kompara sa nakuha ng pilot episode ng programa ng GMA na Once Upon A Kiss na mayroon lamang (15.2%).
At sa totoo lang, kahit saan yata kami magpunta, pinag-uusapan at inaabangan ang mga magaganap sa love story nina Agnes at Xander. Dagdag pa riyan na marami ang nagnanais pumunta sa Benguet para madalaw ang location ng Forevermore na nagiging tourist attraction na sa nasabing probinsiya. Ang bongga ‘di ba?!
Hindi lang nakapagbigay ng magpapasayang panoorin sina Liza at Enrique, nakatulong pa sila sa isang lugar para makilala iyon.
Sa tagumpay na tinatamas ng Forevermore, isa lang ang nais nitong patunayan, sobra-sobra na ang lakas ng dating ng tambalang Liza at Enrique!
ni Maricris Valdez Nicasio
