ni Roldan Castro
HINDI iniwanan nina Nash Aguas at Alexa Ilacad ang youth oriented show tuwing Linggo na Luv U ng ABS-CBN 2 kahit tumatamasa na sila ng tagumpay sa kanilang serye na Bagito.
Sa Luv U nga naman nagsimula ang tandem nila at ayaw nilang masabihan na inggrato at walang utang na loob sa ABS-CBN comedy unit.
Hindi na maawat ang NLEX loveteam at aminado naman sila na crush nila ang isa’t isa. Inile-level na rin sila sa Kathniel, JaDine, at KimXi.
“Nakatutuwa po pero hindi po talaga namin in-expect na ganoon. In-expect lang namin na magiging loveteam kami, na gagawa kami ng project pero sobrang nakakakaba and nakatutuwa na nalilinya kami sa kanila,” pahayag ni Nash.
Sey naman ni Alexa, medyo nakakadagdag din ng pressure, “pero we always try naman our best na maging magaling sa mga ginagawa namin pero siyempre, minsan nako-compare or sinasabihan na ‘linya kayo riyan so dapat galingan n’yo rin’ so, medyo nakadaragdag ng pressure pero ginagawa lang namin talaga ang lahat ng makakaya namin to make it look good.”
Noong Pasko Iphone case raw ang regalo ni Alexa kay Nash at ang bagets actor naman ay dalawang pillow ang ibinigay sa katambal.
