Vigan pasok sa New 7 Wonder Cities

HINIRANG ang Vigan sa Ilocos Sur bilang isa sa New7Wonder Cities.

Kahanay nito ang mga lungsod ng Beirut sa Lebanon; Doha, Qatar; Durban, South Africa; Havana, Cuba; Kuala Lumpur, Malaysia; at La Paz, Bolivia.

Ayon kay Bernard Weber, founder-president ng New7Wonders, layon ng kampanya na piliin ang pitong syudad sa buong mundo na kakatawan sa “global diversity of urban society.”

“For the first time in human history, more than half of our planet’s population lives in cities and this election emphasises the dramatically challenging character of our changing world,” pahayag ni Weber.

Nagsimula noong Oktubre 2013 ang botohan para sa 28 bansa na kabilang sa Official Finalist Candidates ng patimpalak na sinala mula sa kabuuang 1,200 bansang nominado.

Una nang kinilala ng United Nations Educational, Scientific and Cultural Organization (UNESCO), ang Vigan bilang nag-iisang Heritage City ng Filipinas.