Globe naghandog ng libreng tawag pabor sa OFWs

NAGKALOOB ng Libreng Tawag ang Globe Telecom sa overseas Filipino workers (OFWs) na nagtatrabaho mula sa walong (8) bansa sa Asia, Europe, Middle East at North America upang alamin ang kalagayan ng kanilang mga pamilya na naninirahan sa mga lugar na apektado ng pananalasa ng bagyong Ruby.

Ayon kay Gil Genio, Globe Chief Operating Officer for Business and International Markets, ang OFWs mula sa Spain, UK, Saudi Arabia, Canada, Singapore, Hong Kong, USA at Italy na pawang may mataas na bilang ng manggagawang Pinoy ay nabigyan ng pagkakataong kumustahin ang kanilang mga mahal sa buhay.

Sinabi ni Genio na ang pagtatalaga sa walong (8) bansa na direktang pinaglilingkuran ng Globe ang mga manggagawang Pinoy ay bahagi ng kanilang pag-agapay, partikular sa panahon ng kalamidad.

Nilinaw ni Rizza Maniego-Eala, Globe Senior Vice President for International Business na sa bansang Italya, ang libreng tawag ay isinagawa sa Globe stores sa Milan at Rome. Ini-offer naman sa pamamagitan ng Globe accredited retailers ang serbisyo para sa OFWs sa Spain, UK, Saudi Arabia, Canada, Singapore at Hong Kong. Sa US, isinagawa ang Libreng Tawag sa branches ng Seafood City sa west coast, samantala sa east coast ay via web sa pamamagitan ng subscribed access service ng Lunex.

(HNT)