Kuta ng tulak sinalakay 6 timbog

ANIM katao ang naaresto habang 16 sachet ng tuyong dahon ng marijuana at 9 sachet ng shabu ang nakompiska sa magkahiwalay na pagsalakay sa dalawang bayan sa lalawigan ng Rizal kamakalawa.

Sa ulat mula sa tanggapan ni Senior Supt. Bernabe Balba, Rizal PNP Provincial Director, kinilala ang mga nadakip na sina Eduardo Ilocso; Arcelly Arcilla, 41; Ma. Victoria Dumaguit, 40; Myrna Argete, 44; Marlin Arada, 34; at Jay San Jose, 33-anyos.

Unang nadakip si Ilocso dakong 6 a.m. ng mga tauhan ng Pililla PNP, base sa warrant of arrest na inilabas ni Hon. Judge Agripino Morga ng RTC Branch 29-32 ng San Pablo City, Laguna.

Habang nadakip ng mga tauhan ni Chief Insp. Bartolome Marigondon, hepe ng Binangonan PNP, sa buy-bust operation ang limang suspek sa Sampaloc St., Brgy. Batingan ng nabanggit na bayan.

Ed Moreno