PATAY ang isang estudyante makaraan barilin ng hindi nakilalang suspek na nakasabay lamang niya sa pampasaherong jeep kahapon ng madaling araw sa Caloocan City.
Hindi na umabot nang buhay sa Our Lady of Lourdes Hospital ang biktimang si Nicole Jan Macaranas, 17, estudyante ng Caloocan High School at residente ng #14 Victory St., Vista Verde Subdivision, Brgy. 165 ng nasabing lungsod, sanhi ng dalawang tama ng bala ng baril sa ulo.
Habang pinaghahanap ng mga awtoridad ang suspek na mabilis na tumakas makaraan ang insidente.
Sa ulat ni PO3 Gomer Mappala, dakong 4:30 a.m. nang maganap ang insidente sa General Luis St. ng nasabing barangay.
Sakay ang biktima ng pampasaherong jeep (CWM-800) na minamaneho ni Rodrigo Penollar, 35, ng Valenzuela City.
Tinabihan ng suspek ang biktima at dalawang beses na pinaputukan nang malapitan sa ulo bago mabilis na tumakas.
Inaalam na ng pulisya kung ano ang motibo sa nasabing insidente. (ROMMEL SALES)
