Gutom na kelot nagbigti (Kanin ipinagdamot ng ina)
NAGA CITY – Labis ang pagsisisi ng isang ina makaraan magpakamatay ang 27-anyos anak na lalaki nang hindi niya bigyan ng kanin kamakalawa sa Iriga City.
Hindi makapaniwala si Preciosa Velasco na magbibigti ang kanyang anak na si Abundue Bermudez dahil lamang hindi niya nabigyan ng kanin.
Una rito, umuwi ng hatinggabi ang biktima at kumatok sa bahay ng kanyang ina upang humingi ng kanin dahil nagugutom.
Nagalit ang biktima nang walang naibigay na kanin ang ina at nagtatampong sinabi na konting kanin lang ay ipinagdadamot pa niya.
Sinabi pa niya sa ina na kinabukasan ay aalis na siya bago tumalikod at umuwi sa kanyang bahay na kaharap lamang ng tahanan ng kanyang ina.
Walang kaalam-alam si Velasco na pagdating sa kabilang bahay ay kinuha ni Bermudez ang lubid ng duyan at itinali sa kanyang leeg.
Huli na nang matagpuan niya kinaumagahan na wala nang buhay at nakabitin na ang katawan ng biktima sa nasabing bahay.
