[divider]
TAON talaga ngayon ng pagpo-propose. Pagkatapos alukin ng kasal ni Dingdong Dantes si Marian Rivera at ni Sen. Chiz Escudero si Heart Evangelista, nag-propose na rin noong Miyerkoles ng gabi si John Prats kay Isabel Oli.
Magka-birthday sina Heart at John (February 14).
Ayon sa balita, isinagawa ni John ang pagpo-propose matapos ang flash mob sa Eastwood Mall sa Quezon City.
Habang nasa Eastwood sina Isabel at kapatid ni John na si Camille, lumabas ang isang malaking screen na may mensahe ang 30 taong gulang na aktor. Pagkatapos ng message, isang fireworks ang sumunod na lumabas.
Bago ito’y isang night out ang paanyaya ni Camille sa 33 taong gulang na aktres kaya ito sumama. At nang dumating sila sa may plaza sa Eastwood, naglabasan din ang napakaraming tao. Roon na lumabas si John para pangunahan ang flash mob.
Lumuhod si John sa harapan ni Isabel at hiningi ang kamay nito at sumagot naman si Isabel ng “yes”.
ni Maricris Valdes Nicasio
