Hashtag kagandahan sa GRR TNT

MAKIKIUSO si Mader Ricky Reyes ngayong Sabado sa mga netizen at ang episode ng Gandang Ricky Reyes Todo Na Toh (GRR TNT) ay pinamagatang Hashtag Kagandahan.

Unang itatampok ay ang paalaala ni Mader na ‘di lang dapat na ang panlabas na byuti ang alagaan. Dapat ay okey ding panatilihin ang katawan na malusog sa pamamagitan ng mga kinakaing organic at pag-inom ng mga herbal na suplimento.

Dating magsasaka na naging marino ang ngayo’y milyonaryo at pilantropong si Kapitan Gaudencio Morales. Kapuri-puri ang pagkakaroon niya ng maganda at ginintuang puso sa pagtulong niya sa mga mahihirap at nangangailangan ng tulong. “Pinatunayan niya na ang paraan ng pagbabalik ng ibinigay sa kanyang biyaya ni Lord ay pagtulong sa mga nagdarahop sa buhay,” sabi ni Mader matapos ang one on one interbyu niya sa ginoo.

Alam n’yo bang ‘di biro ang gastos ng mga taong mahilig mag-alaga ng aso? Makikita sa programa kung paano gastahan ng mga amo  ang itinuturing na man’s bestfriend sa dog food, check up sa beterinaryo, immunization, bitamina, at grooming.

Halos maiyak naman ang isang tindera sa palengke matapos siyang gawan ni Mader ng isang make over magic. Pagtingin niya sa salami’y nagulat siya sa naging transpormasyon … “from ugly duckling into a swan.” Ngayo’y maaari na siyang tawaging Tindera Cinderella.

Ang GRR TNT ay napapanood tuwing Sabado, 9:00-10:00 a.m. sa GMA News TV. Prodyus ito ng ScriptoVision. Tutok lang dahil sinisikap ni Mader na ang lingguhang pagtatanghal ay maging makabuluhan at kapupulutan ng napapanahong isyu tungkol sa kagandahan, kabuhayan, kalusugan, at karunungan.